કચ્છના કડવા પાટીદારોના ઈતિહાસ પ્રમાણે આપણા વડવાઓ પંજાબમાંથી આવી ગુજરાતમાં ઊંઝા આસપાસ વસવાટ કર્યો હતો અને ત્યાંથી કચ્છનાં જુદાં જુદાં રજવાડાઓમાં, જ્યાં જ્યાં જમીન મળી ત્યાં ખેતીના વ્યવસાયમાં લાગી ગયા. સમયાંતરે જે વિસ્તારમાં પાતાળનાં પાણી ખુટ્યાં અને આકાશી ખેતીમાં તકલીફ પડવા માંડી ત્યારે અમુક સમૂહ હાલના સાબરકાંઠા જિલ્લો અને આસપાસના વિસ્તારોમાં જમીનની વ્યવસ્થા મળતાં ત્યાં ખેતી અને વસવાટ કરવા લાગ્યા. આગળ જતાં લાગલગાટ દુષ્કાળના વર્ષો આવતાં અને ખેતી થકી ગુજરાન ચલાવવું પણ મુશ્કેલ થવા લાગ્યું ત્યારે આપણા પાટીદારો કમશ: ધીમે ધીમે કચ્છ બહાર નીકળી ગુજરાત અને સમગ્ર ભારતભરમાં પહોંચી લાકડાના ધંધા ઉભા કરી જીવન નિર્વાહ ચલાવવા લાગ્યા. મહેનત, પ્રમાણિકતા અને સૌની સાથે પ્રેમથી ભળી જવાનો સંસ્કાર ધરાવતા આપણા વડીલો ધીમે ધીમે આર્થિક રીતે મજબુત થતા ગયા પણ સાથે સાથે જે તે વિસ્તારની ઈતર સમાજોમાં આગવી ઓળખ ઉભી કરી સન્માન અને ઈજ્જત પણ મેળવતા ગયા. આ ઓળખને કારણે આપણા આર્થિક વિકાસને પણ વેગ મળતો ગયો અને આપણે આર્થિક રીતે સાધન-સંપન્ન બનતા ગયા. લાકડાંના મુળભુત બિઝનેસના વિકાસની સાથે સાથે અનેક નવા ક્ષેત્રમાં સાહસો કરી સફળતા મેળવતા ગયા...